點樣改善「喉嚨聲」？

成日有人問：點樣改善「喉嚨聲」？點樣唔用喉嚨唱歌？

唱歌時，聲帶響喉嚨入面振動，產生聲音，所以唱歌一定要用喉嚨。呢一點我諗而家好多人都知道。

大家真正想改善既，好多時係聲音卡住響喉嚨、發聲唔順暢既感覺，覺得聲音塞住左，放唔到出來。

呢種感覺有時同喉部過度收緊（constriction）有關，例如喉部周圍繃緊、舌根過度後縮或者僵硬。不過，單靠「卡住」既感覺，未必能夠判斷原因；聲道收窄本身亦唔一定係問題，要視乎程度同唱法。

以我既教學經驗，唔少有呢種困擾既香港學生，會有舌頭活動唔夠靈活、舌根比較繃緊既情況，有時可能同平日講野既習慣有關。

針對呢類情況，我一般會嘗試加入舌頭活動同協調練習，觀察發聲有冇改善。例如用廣東話練習讀／唱「加啦激他」。

「加啦激他」可以點樣練？

舌頭協調練習會用一的音節，令到舌頭不同部位交替活動。用廣東話可以試下「加啦激他」。

目的唔係追求每隻字都讀得好標準，而係練習更靈活、流暢既舌頭動作。

先用講野既方式重複，唔需要咬字咬到好「實」：

加啦激他、加啦激他、加啦激他……

用容易掌握既速度，感受舌頭既活動，做到流暢、輕鬆之後，再逐步加快，亦可以配合音階練習。

初初練習時，可能會覺得唔順、舌頭唔太聽使。可以先放慢速度、縮短每次練習時間，唔需要勉強追求快。如果出現酸軟或者越練越繃緊，就先停低休息；有痛楚就唔好繼續。

如果舌頭過度用力或者舌根繃緊係其中一個影響因素，呢類練習可能有助改善「喉嚨聲」，但唔係所有情況都適用。

記得先讓舌頭輕鬆、順暢咁活動，再慢慢加快。重點唔只係音節讀得更熟練，而係練習之後，唱歌或者講野有冇更順暢，「喉嚨聲」既感覺有冇減少。