傳統唱歌教學成日話要「用丹田」。咁究竟係用緊咩？

以我所知，「丹田」係中國傳統文化既概念，同道教修煉、養生有關係，響氣功同武術入面都聽過。傳統有上、中、下丹田之分，平時講「氣沉丹田」，一般應該係指肚臍以下既下丹田，唔係現代解剖學上一個獨立器官。

響我見過會用丹田概念既唱歌教學入面，「用丹田」好多時係提醒你將呼吸既感覺放低，感受吸氣時下肋同腹部既活動，再協調唱歌時既呼氣，而唔係真係由丹田發聲。空氣始終係入肺，唔係入左肚裡面。

所以響呢類教學入面，「用丹田」可以理解為一種呼吸協調既提示，同唱歌時講既「呼吸支持」有關。

外國傳統唱歌教學亦有類似既提示，例如「Sing from your diaphragm」，即係「用橫隔膜唱歌」。橫隔膜係參與呼吸既肌肉，但聲音唔係由佢產生。呢個講法同「用丹田」一樣，好多時係想提示呼吸支持，而唔係指出聲音既來源。

咁係咪做好呼吸支持，就自然唱得好？
呼吸方式改善左，唔代表聲音自然就會好聽。

從現代發聲科學，我地知道唱歌需要呼吸、聲帶振動、共鳴調節同咬字等互相配合。呼吸只係其中一環，唔係腹部越用力，聲音就越穩、越有力。只係用力推氣，反而可能令發聲更費力。

以我既教學經驗，唔少新學生黎搵我之前，都會將「丹田用力」理解成腹部要「谷硬晒」，以為越用力就越有「support」。但呼吸支持唔係靠大力，而係配合唔同音高、音量同樂句既需要，協調呼氣同聲門下氣壓。

我自己教學就冇用到「丹田」呢個概念，而係直接講解同練習呼吸發聲之間既配合。不過有時學生做到比較順暢既配合之後，都會話：「原來咁樣就係用緊丹田！」